ڕێکخراوی تەندروستیی جیھانی ڕایدەگەیەنێت، ئامارەکانی ڤایرۆسی کۆرۆنا لە لووتکەدان و ھەفتەی ڕابردوو ٩٠ ھەزار کەس بەھۆی ڤایرۆسەکەوە گیانیان لە دەستداوە.
تیدرۆس ئەدھانۆم بەرێوەبەری گشتی ڕێکخراوی تەندروستیی جیھانی ڕایگەیاند، لە سەرانسەری جیھاندا ئامارەکانی تووشبوون و گیان لە دەستدان بە کۆرۆنا زیایکردووە و گەیشتووەتە لووتکە، بە جۆرێک پێشتر ھاوشێوەی نەبووە و ھەفتەی ڕابردوو پێنج ملیۆن و ٤٠٠ ھەزار کەس تووشی کۆرۆنا بوون و نزیکەی ٩٠ ھەزار کەسیش گیانیان لە دەستداوە.
ڕاشیگەیاند، لە وڵاتانی باشووری خۆرھەڵاتی کیشوەری ئاسیا، ئامارەکان لە بەرزبوونەوەدان و جێگەی نیگەرانین.
وتیشی، چاودێری ڕەوشی ھندستان دەکەن، بۆ دەستنیشانکردنی ئەو ڤایرۆسە گۆڕاوەی بڵاوبووەتەوە، چونکە نیگەرانیەکی جیھانیی دروستکردووە.