کوردستان

لاهور شێخ جەنگی پێشوازیكرد لە كونسڵی بەریتانیا لە هەرێم


لاهور شێخ جەنگی هاوسەرۆكی یەكێتی ڕایگەیاند، پابەندبوون بە یاسای بودجە و جێبەجێكردنی بە ئەندازەی پەسەندكردنی بودجەكە گرنگە.

لاهور شێخ جەنگی لە شاری سلێمانی پێشوازی كرد لە جەیمس سۆرنتن، كونسڵی گشتیی بەریتانیا لە هەرێمی كوردستان و وەفدێكی هاوڕێی. لە كۆبوونەوەكەدا باس لە ڕەوشی سیاسی و ئابووری و ئەمنیی عێراق و هەرێم و پەرەپێدانی پەیوەندییەكانی نێوان هەردوولا كرا و لاهور شێخ جەنگی ئاماژەی بە جێگریكردنی پشكی هەرێمی لە بودجەدا كرد و بە هەنگاوێكی گرنگ وەسفیكرد بۆ چارەسەركردنی كێشە داراییەكانی نێوان ‌حكومەتی هەرێم و بەغداد.

جەختیشیكردەوە، لەوەی پابەندبوون بەو یاسایە و جێبەجێكردنی بە ئەندازەی پەسەندكردنی بودجەكە گرنگە، كە دەبێتە مایەی سەقامگیری سیاسی و ئابووری و گەڕاندنەوەی مووچەی فەرمانبەران بۆ ڕەوشی ئاسایی خۆی.

لە بەشێكی تری دیدارەكەدا لاهور شێخ جەنگی ویستیی سەرۆكایەتیی یەكێتیی دووپاتكردەوە بۆ چاكسازیی لە نێو هێزی پێشمەرگەی كوردستان بۆ ئەوەی كوردستانیش ببێت بە خاوەنی یەك هێزی یەكگرتووی نیشتیمانی، ئەنجامدانی هەڵمەتێكی هاوبەشی هێزی پێشمەرگە و سوپای عێراقیشی بە پێویست زانی بۆ ڕووبەڕووبوونەوەی جموجۆڵی تیرۆریستانی داعش بە تایبەت لە سنووری ناوچە دابڕێندراوەكان.



هەفتە پێشتر - Apr 4 2021 3:22PM
Print Friendly and PDF
زیاتر