چەند رۆژێکە ئێران ئاوی روباری سیروانی بەرداوەتەوە
2021-07-24
کوردسات نیوز
چەند رۆژێکە ئێران ئاوی روباری سیروانی بەرداوەتەوە، بەڕێوەبەری بەنداوی دەربەندیخانیش دەڵێت، ئەگەر بەردانەوەی ئاو بەردەوام بێت کاریگەری لەسەر عەمبارکردنی ئاوی بەنداوەکە دەبێت.
"رەحمان خانی" بەڕێوەبەری بەنداوی دەربەندیخان بە کوردسات نیوزی راگەیاند، ماوەی ٤ رۆژە ئێران ئاوی روباری سیروانی بەرداوەتەوە و ئەگەر بەردەوامیش بێت، کاریگەری لەسەر عەمبارکردنی ئاو لە بەنداوەکە دەبێت و دەتوانرێت ئاوی زیاتر بۆ ناوچەکانی خواروی بەنداوەکە بەربدرێتەوە.
وتیشی، ئێستا رێژەیەکی کەم لە ئاوی بەنداوەکە بەرزبۆتەوە، چونکە بڕەکەی کەمە و لە مانگی ئاداری رابردوو سەرچاوەی ئاوی روباری سیروان لە بەنداوی دەربەندیخان بڕابوو.
"رەحمان خانی" ئاماژەی بۆ ئەوەشکرد، بەردانەوەی ئاوی سیروان کاریگەری لەسەر وێستگەی ئاوی خواردنەوەی، "ھەڵەبجە - سیروان - سەیدسادق"یش دەبێت، چونکە وێستگەی ئاوی خواردنەوەی ئەو ناوچانە لەسەر روباری سیروان دانراوە.
|