راپۆرت

ڕۆحانی: گەڕانەوە بۆ ڕێككەوتنی ئەتۆمی گوزارشت لە سازش ناكات


ئەمریكا داوایەكی وڵاتانی ئەوروپا بۆ بەشداریكردن لە كۆبوونەوەیەكی تایبەت بە دۆسیەی ئەتۆمی كە ئێرانیش ئامادەی دەبێت قبوڵ دەكات و ئیسڕائیلیش لەو هەنگاوەی ئاگادار دەكاتەوە. ئەوەش بە سەرەتای هەولێكی تر دادەنرێت بۆ گەڕانەوەی تاران و واشنتۆن بۆ ڕێككەوتنی ئەتۆمی.

وەزارەتی دەرەوەی ئەمریكا ڕایگەیاند: وڵاتەكەی ڕەزامەندی لەسەر داواكارییەكی وڵاتانی ئەوروپا پیشانداوە بۆ بەشداریكردن لە كۆبوونەوەیەكی وڵاتانی ٥+١ و ئێران، سەبارەت بە دۆسیەی ئەتۆمی ئێران.

(ئەنتۆنی بلینكن)، وەزیری دەرەوەی ئەمریكا، ئاشكرای كردوە (جۆو بایدن)، ئامادەیە بگەڕێتەوە بۆ ڕێككەوتنی ئەتۆمی ئەگەر بێت و تارانیش بە تەواوەتی پابەندی ڕێككەوتنامەكە بێت و دەستبەرداری پیتاندنی یۆرانیۆم ببێت.

سەرچاوەیەك لە كۆشكی سپی ئاشكرای كردووە، (جۆو بایدن) سەرۆكی ئەمریكا لە یەكەم پەیوەندیی تەلەفۆنی لەگەڵ (بینیامین ناتانیاهۆ) سەرۆك وەزیرانی ئیسرائیل ڕایگەیاندووە: واشنتۆن ئامادەكاری دەكات بۆ دەستپێكردنی گفتوگۆكان لەگەڵ تاران لەسەر پرسی بەرنامە ئەتۆمییەكە، بەڵام (ناتانیاهۆ) نیگەرانی خۆی لە بەرامبەر ئەو هەنگاوەی ئیدارەی نوێی كۆشكی سپی پیشانداوە.

لە بەرامبەر هەڵوێستەكانی ئیدارەی بایدن، (حەسەن ڕۆحانی) سەرۆكی ئێران، ڕایگەیاند: قەرەبووكردنەوەی هەڵەكانی (تڕەمپ) و گەڕانەوە بۆ بڕیارەكانی ئەنجوومەنی ئاسایش و ڕێككەوتنی ئەتۆمی، گوزارشت لە سازشی ئەمریكا ناكات، داواشی لە یەكێتی ئەوروپا كردووە، نێوەندگیری لە سەرخستنی ئەو هەوڵە بكەن، وەزارەتی دەرەوەی ئێرانیش داوای هەڵگرتنی سزاكانی ئەمریكا بۆ سەر وڵاتەكەی دەكات.

هاوكات (هایكۆ ماس) وەزیری دەرەوەی ئەڵمانیا داوای لە تاران كردووە هەنگاوی دروست و پێویست لەو بارەیەوە بنێت و ڕایگەیاندووە: هەنگاوەكانی ئەمدواییەی ئێران بۆ زیادكردنی ڕێژەی زیاتری پیتاندنی یۆرانیۆم، ڕێگەی دیپلۆماتییەكان بۆ ڕێككەوتننامەكە قورستر دەكات و دانوستانەكانیش ئاڵۆز دەكات، (هایكۆ ماس) نەگەڕانەوەی ئێرانیشی بۆ ڕێككەوتنەكە، بە یاركردن بە ئاگر ناوبردووە.

لە ئاماژەیەكی تریشدا بۆ تێپەڕاندنی قەیرانی ڕێككەوتنی ئەتۆمی، كاربەڕێكەری باڵیۆزی ئەمریكا لە نەتەوە یەكگرتووەكان لە نامەیەكدا بۆ ئەنجومەنی ئاسایش ڕایگەیاندووە، داوایەكی ئیدارەی دۆناڵد تڕەمپیان لە بارەی دووبارە سەپاندنەوەی سزاكانی نەتەوە یەكگرتووەكان بۆ سەر ئێران كشاندووەتەوە. جگە لەوەش ئیدارەی واشنتۆن كۆت و بەندەكانی لەسەر هاتووچۆی دیپلۆماتكارانی ئێران لە بارەگای نەتەوە یەكگرتووەكان كەمكردووەتەوە.



هەفتە پێشتر - Feb 19 2021 1:07PM
Print Friendly and PDF
زیاتر