سەرۆکی روسیا سەردانی سعودیە و ئیمارات دەکات

2023-12-06   |  
فۆتۆ: 
کوردسات نیوز
ئەمڕۆ ڤلادیمیر پوتن سەرۆکی روسیا، سەردانی سعودیە و ئیمارات دەکات، سبەینێش لەگەڵ سەرۆککۆماری ئێران کۆدەبێتەوە، یەکێک لە بابەتەکانی کۆبوونەوەکانیشی گفتوگۆکردنە لەبارەی جەنگی فەڵەستین و ئیسرائیل.

دیمیتری پیسکۆڤ وتەبێژی کۆشکی سەرۆکایەتیی روسیا-کرملین، رایگەیاند، ئەمڕۆ ڤلادیمیر پوتن سەردانی سعودیە و کەمێک لەمەوبەریش گەیشتە ئیمارات و گفتوگۆ لەبارەی دوایین پێشھاتەکانی رەوشی رۆژھەڵاتی ناوەڕاست و جەنگی فەڵەستین و ئیسرائیل دەکات.

دیمیتری پیسکۆڤ راشیگەیاند، پوتن و سەرکردەکانی سعودیە و ئیمارات، گفتوگۆ لەبارەی بەھێزکردنی پەیوەندییەکانیان دەکەن، وتیشی، بڕیاروایە رۆژی پێنجشەممە پوتن بگەڕێتەوە و لە مۆسکۆ پێشوازی لە ئیبراھیم رەئیسی سەرۆککۆماری ئێران بکات، سەردانەکەی رەئیسیش بۆ مۆسکۆ یەک رۆژ دەخایەنێت.