سۆمۆ: مانگی رابردوو چین زۆرترین نەوتی عێراقی کڕیوە

2023-11-28   |  
فۆتۆ: 
کوردسات نیوز
کۆمپانیای سۆمۆ رایدەگەیەنێت، لە مانگی رابردوودا کۆمپانیا چینییەکان زۆرترین نەوتی عێراقییان کڕیوە.

کۆمپانیای سۆمۆ ئاماری نەوتی ھەناردەکراوی مانگی تشرینی یەکەمی ئەمساڵی بڵاوکردەوە و تیایدا ھاتووە، کۆمپانیا چینییەکان زۆرترین نەوتییان لە نەوتی ھەناردەکراوی عێراق کڕیوە و بەجۆرێک کە نۆ کۆمپانیای چینی لە نێوان ٣٨ کۆمپانیای جیھانیدا نەوتی عێراقیان کڕیوە. 

ئاماژەی بەوەشکردوە، کۆمپانیا ھیندییەکان بە پلەی دووەم دێن کە حەوت کۆمپانیا ھەستاون بە بارکردن و کڕینی نەوتی عێراق و کۆمپانیا ئەمریکییەکانیش بە پلەی سێیەم دێن.

سۆمۆ دەشڵێت، فرۆشتنی نەوتی عێراق پشت بە ستانداردە بنچینەییەکانی گرێبەست کردن لەگەڵ کۆمپانیا نەوتییە جیھانییە گەورەکان و مامناوەندییەکان دەبەستێت و دیارتریین کۆمپانیا کە نەوتی عێراق دەکڕین کۆمپانیای ئیندیلان ئۆیڵی ھیندی و کۆکازی کۆری و ئیکسۆن مۆبێلی ئەمریکی و ئاینی ئیتاڵی و شێڵی ھۆڵەندی- بەریتانین.