وەزارەتی دەرەوەی ئێران: رێککەوتنی ئەمنی نێوان عێراق و ئێران بەشێکی جێبەجێنەکراوە

2023-10-02   |  
فۆتۆ: 
کوردسات نیوز
وتەبێژی وەزارەتی دەرەوەی ئێران رایگەیاند، رێککەوتنی ئەمنی نێوان عێراق و ئێران بەشێکی جێبەجێنەکراوە، بە ھیچ نەرمیەکیش بۆ جێبەجێنەکردنی تەواوی رێکەوتنەکە نانوێنن.

ناسڕ کەنعانی وتەبێژی وەزارەتی دەرەوەی ئێران لە کۆنفرانسێکی رۆژنامەوانیدا ئاماژەی بەوەکرد، بۆ دڵنیابوون لە جێبەجێکردنی ئەو رێککەوتنە لیژنەیەک نێردراوەتە ھەرێمی کوردستان و دڵنیایی دراوە لە جێبەجێکردنی ئەو رێککەوتنە.

وتیشی ئێران سورە لە جێبەجێکردنی سەرجەم بڕگەکانی  ئەو رێکەوتنەو نەرمی لەو بارەیەوە نانوێنێت.

دوێنێ یەکشەممە، وەفدێکی ئەمنیی عێراق و ھەرێمی کوردستان، لە تاران لەگەڵ راوێژکاری ئاسایشی نیشتمانیی ئێران کۆبووەوە و گفتوگۆیان لەبارەی ئەو رێککەوتنە ئەمنییەکە کرد، کە دوورخستنەوەی حزبەکانی رۆژھەڵاتی کوردستان لە سنوورەکانی ئێران و چەک داماڵینیان لەخۆدەگرێت.

ئێران جەخت لەجێبەجێکردنی تەواوەتیی رێککەوتنی چەکداماڵێنی حزبەکانی رۆژھەڵات دەکاتەوە، عێراقیش دەڵێت لە چوارچێوەی جێبەجێکردنی رێککەوتنەکە، ١٢ خاڵی سنوورییان لەگەڵ ئێران داناوە.



 زۆرترین خوێندراو