تەندروستی

لە سوید و دانیمارك پاسپۆرتی تایبەت بە كۆرۆنا دەدرێت بە هاوڵاتیان


لە سوید پلان هەیە ناسنامەی ڤاكسین بۆ ئەو هاوڵاتیانە دروست بكرێت كە ڤاكسینی كۆرۆنا وەردەگرن تا بتوانن گەشت بكەن لە ناوخۆ و دەرەوەی وڵاتەكەیان.

ئەندرێس یچمن وەزیری بە دیجیتاڵكردنی سوید ڕایگەیاند، سێ‌ دەسەڵاتی ئەو وڵاتە ڕاسپێردراون بە هەماهەنگی لەگەڵ ڕێكخراوی تەندروستیی جیهانی و یەكێتیی ئەوروپا ناسنامەیەك بۆ ئەو مەبەستە دروست بكەن و بیدەن بەو كەسانەی ڤاكسینەكە وەردەگرن.

ستیفان لۆفڤین سەرۆك وەزیرانی سویدیش دەڵێت، پێویستە ئەو ناسنامەیە بە ستانداردێكی جیهانی و بە شێوازێكی دیجیتاڵی دروست بكرێت تا لە ناوخۆ و دەرەوەی وڵاتیش كاری پێ‌ بكرێت.

ڕاگەیاندنی ئەو پلانە لەلایەن حكومەتی سویدەوە، ڕۆژێك دوای دەستپێشخەریەكی هاوشێوەی حكومەتی دانیمارك دێت كە تیایدا ئاماژە بەوەكراوە لەگەڵ بازرگانان و بیزنزمانەكاندا هەماهەنگی كراوە بۆ پێدانی پاسپۆرتێكی تایبەت بە ڤایرۆسی كۆرۆنا و ئاماژە بەوەشكراوە، ئەو پاسپۆرتە لە چەند مانگی داهاتوودا دەبەخشرێت بە هاوڵاتیان، بە تایبەتیش ئەو كەسانەی سروشتی كارەكانیان وا دەخوازێت بەردەوام سەردانی دەرەوەی وڵات بكەن.

هاوكات یۆهان كارڵسن لێپرسراوی تەندروستیی گشتی لە سوید، كە دژی كەرنتینكردنی سەرانسەری بوو لە سوید، پێی وایە باشترین ڕێگە بۆ بەرەنگاربوونەوەی كۆرۆنا دروستكردنی بەرگریەكی بە كۆمەڵە. وتیشی، نابێت ئەو ناسنامەیە ئەو هەستە لای هاوڵاتیان دروست بكات كە ئازادی تەواویان هەیە بە دڵی خۆیان ڕەفتار بكەن و پێویستە بە ئاگابن لەوەی مەترسیی گەڕانەوەی كۆرۆنا هەیە.

2 مانگ پێشتر - Feb 5 2021 5:47PM
Print Friendly and PDF
زیاتر