تەکنەلۆژیا

ڕووسیا سزای "تیک تۆک" و چەند تۆڕێکی کۆمەڵایەتی تر دەدات


ئاژانسی "BBC Tech" لە هەواڵێکدا ڕایگەیاندووە کە حکومەتی ڕووسیا بە نیازە سزای دارایی بەسەر پڕۆگرامی بڵاوکردنەوەی کورتە ڤیدیۆی "تیک تۆک" و تۆڕە کۆمەڵایەتییەکانی وەک "فەیسبوک" و "تویتەر"دا بسەپێنێت بەهۆی بڵاوکردنەوەی ئەو ڤیدیۆ و بڵاوکراوانەی کە هانی گەنجان دەدات بەشداری لە خۆپیشاندانەکانی ئۆپۆزسیۆنی ڕووسیادا بکەن.

بە پێی هەواڵەکە، حکومەتی مۆسکۆ بڕی ٤ ملیۆن ڕوبڵی ڕووسی کە دەکاتە نزیکەی ٥٣ هەزار دۆلاری ئەمریکیی وەک سزای دارایی بەسەر کۆمپانیاکانی ناوبراودا سەپاندووە بەهۆی پابەندنەبوون بە داوایەکی حکومەتەوە بۆ سڕینەوەی تەواوی ئەو ڤیدیۆ و بڵاوکراوانەی کە پاڵنەرن و هانی گەنجان دەدەن دژی حکومەت بوەستنەوە.

جێی ئاماژەیە، لە ماوەی ڕابردوودا هەزاران هاووڵاتی ڕووسی دژی دەستگیرکردنی "ئەلێکسی ناڤالنی" سەرکردەی ئۆپۆزسیۆنی ڕووسیا ڕژانە سەر شەقامەکان و خۆپیشاندانیان ئەنجامدا کە تۆڕە کۆمەڵایەتییەکانیش ڕۆڵی سەرەکیان هەبووە لە کۆکردنەوە و هاندانی هاووڵاتیان و لایەنگرانی ئۆپۆزسیۆن.



3 مانگ پێشتر - Jan 30 2021 1:01PM
Print Friendly and PDF
زیاتر
12