کۆمسیۆنی باڵای سەربەخۆی ھەڵبژاردنەکان مامۆستایانی زانکۆ و پەیمانگەکان دەکات بە بەڕێوەبەری بنکەکانی دەنگدان، مانگی داھاتووش تیروپشک بۆ ژمارەی کاندیدەکان دەکرێت.
کۆمسیۆنی باڵای سەربەخۆی ھەڵبژاردنەکانی عێراق نووسراوێکی ئاڕاستەی وەزارەتی خوێندنی باڵا و توێژینەوەی زانستی عێراق کردووە و ئاماژەی بۆ ئەوەکردووە، بە بڕیاری ئەنجومەنی وەزیران داوا لە وەزارەتی خوێندنی باڵا دەکات ناوی مامۆستایانی زانکۆ و پەیمانگەکان بە پێی فۆڕمێکی ئەلیکترۆنی، کە بۆ وەزارەت نێردراوە ڕەوانەی کۆمسیۆن بکەن، پێویستە لەگەڵ ناوی مامۆستایاندا، ژمارەی کارتی دەنگدانی ھەر مامۆستایەک ڕەوانە بکرێت بە مەبەستی ئەوەی بە پێی ئەو شوێن و ناوەندانەی دەنگدان دابنرێن، کە خۆیان سەر بەو ناوەندەن بۆ ئەوەی وەک بەڕێوەبەری ناوەندەکە یان وێستگەی دەنگدان دیاری بکرێن.
کۆمسیۆن بڕیاریداوە ڕۆژی ٥ی تەمموزی داھاتوو نووسینگەکانی کۆمسیۆنی ھەڵبژاردنەکان لە پارێزگاکان تیروپشکی پێدانی ژمارە بە کاندیدەکانی ھەڵبژاردن ئەنجام بدەن.