کوردستان

هاوسەرۆکانی یەکێتیی و کونسوڵی گشتیی ئەمریکا لە هەرێمی کوردستان کۆبوونەوە


ئەمڕۆ سێشەممە هاوسەرۆکانی یەکێتیی نیشتیمانیی کوردستان لە شاری سلێمانی پێشوازییان کرد لە ڕۆب واڵەر کونسوڵی گشتیی ئەمریکا لە هەرێمی کوردستان و وەفدی هاوڕێی.

لە دیدارێکدا بارودۆخی سیاسی و ئابووری و ئەمنی و پرسی هەڵبژاردنی پێشوەختە لە هەرێمی کوردستان و عێراق لەبەر ڕۆشنایی پێشهات و ڕووداوەکانی ئێستا تاوتوێ کرا و پێویستی بەردەوامبوونی هەوڵەکانیش بە ئامانجی سازکردنی دیالۆگی جدی و لابردنی بەربەستەکان دووپات کرایەوە.

هاوسەرۆکانی یەکێتیی جەختیانکردەوە لەسەر پێویستی خستنەگەڕی هەوڵەکان بۆ چارەسەرکردنی کێشەکان لە پێناو دابینکردنی ژیانێکی شایستە بۆ هاوڵاتیان و پاراستنی ئارامی ناوچەکە.

تەئکیدیشیان لە جێبەجێکردنی سیستمی لامەرکەزیی کردەوە لە چوارچێوەی ڕێککەوتنیان لەگەڵ پارتی دیموکراتی کوردستان بۆ بەشداریکردنی لە حکومەت، هاوکات بە خاڵێکی گرنگیان لە قەڵەمدا بۆ بەهێزکردنی حکومەت و پاراستنی زیاتری قەوارەی هەرێمی کوردستان و زیاتر خزمەتکردنی هاووڵاتییان و پێشکەشکردنی خزمەتگوزاریی زیاتر و باشتر بە سەرجەم پارێزگاکانی هەرێم.

ئامادەیی یەکێتیی نیشتیمانیی کوردستانیشیان دووپاتکردەوە بۆ کاری هاوبەش و پێکەوەیی و پاراستنی یەکڕیزیی لە نێوان هێز و لایەنەکان.

هاوسەرۆکانی یەکێتیی داوایان لە ویلایەتە یەکگرتووەکانی ئەمریکا کرد کە ڕۆڵی خۆی ببینێت لە لێکنزیککردنەوەی بیروبۆچوونی لایەنەکان و یەکلاکردنەوەی کێشەکان لە پێناو تێپەڕاندنی ئەم قۆناغە و کۆتایهێنان بە کێشە هەڵپەسێردراوەکانی نێوان حکومەتی هەرێم و حکومەتی فیدراڵی لەسەر بنەمای دەستوور بە جۆرێک کە مافەکانی هاووڵاتییانی تێدا پارێزراو بێت و چیتر ڕێگە نەدرێت قوت و بژێوی ژیانی هاووڵاتییان تێکەڵ بە  کێشە و ململانێی سیاسییەکان بکرێت و ژیان و گوزەرانی خەڵک پارێزراو بێت.

کونسوڵی گشتی ئەمریکا ئامادەیی وڵاتەکەی دووپاتکردەوە بۆ بەردەوامی هەوڵەکان و یارمەتیدان و هاوکاریکردنی لایەنەکان بۆ دۆزینەوەی چارەسەری گونجاو و ڕێککەوتنی کۆتایی لە نێوان حکومەتی هەرێم و حکومەتی فیدراڵ.

ڕاشیگەیاند کە وڵاتەکەی لە ڕووی پێداویستی پزیشکی و کەرتی تایبەتەوە هاوکاری هەرێمی کوردستان دەکەن.



مانگ پێشتر - Jan 19 2021 2:28PM
Print Friendly and PDF
زیاتر