راپۆرت

ئەردۆغان كار بۆ ئاساییكردنەوەی پەیوەندییەكانی لەگەڵ ئەوروپا دەكات


ڕەجەب تەیب ئەردۆغان سەرۆكی توركیا هەوڵ دەدات دووبارە پەیوەندییەكانی لەگەڵ یەكێتی ئەوروپا ئاسایی بكاتەوە، بۆ ئەو مەبەستەش داوای نیازپاكی لە ئەندامانی یەكێتیەكە دەكات. ئەردۆغان لە وتەیەكیدا بۆ باڵیۆزانی یەكێتی ئەوروپا لە ئەنقەرە ڕایگەیاند، هیوایان هەیە بڕیارەكەی توركیا بۆ دەستپێكردنەوەی دانوستانەكانی لەگەڵ یۆنان، قۆناغێكی نوێ لە پەیوەندی نێوان ئەو دوو وڵاتە دروست بكات.

ڕەفتارەكانی توركیا بەرامبەر بە یۆنان و قوربرس و گەڕانەكانی بۆ گازی سروشتی لە خۆرهەڵاتی دەریای ناوەراست وڵاتانی ئەوروپای نیگەران كرد و كار گەیشتە ئەوەی یەكێتی ئەوروپا بیر لە سزادانی توركیا بكاتەوە، بەڵام ماوەیەكە ئەنقەرە كار بۆ هێوركردنەوەی گرژییەكان دەكات و بە نیازە جارێكی تر هەوڵەكانی بۆ بە ئەندام بوون لە یەكێتی ئەوروپا دەستپێبكاتەوە.

ئەردۆغانیش لە وتارەكەیدا بۆ باڵیۆزانی یەكێتی ئەوروپا، جارێكی تر ئارەزووی وڵاتەكەی بۆ بە ئەندام بوون لە یەكێتی ئەوروپا دووپاتكردەوە و ڕایگەیاند هەرگیز دەستبەرداری ئەو ئامانجە نابن.

لە ساڵی ٢٠٠٥ توركیا دانوستانەكانی بۆ بە ئەندام بوون لە یەكێتی ئەوروپا دەستپێكردووە، بەڵام لە ساڵی ٢٠١٦دا دانوستانەكان گەیشتنە ڕێگایەكی داخراو ئەوەش بەهۆی ئەو تۆمەتانەی یەكێتی ئەوروپا بەردەوام سەبارەت بە دیموكراسیەت و پێشێلكردنی مافەكانی مرۆڤ ئاڕاستەی توركیای دەكات.



هەفتە پێشتر - Jan 13 2021 7:24PM
Print Friendly and PDF
زیاتر