مەترسی ھەیە نرخی خۆراک بە ڕێژەی ١٠٪ زیاد بکات

2022-06-04   |  
فۆتۆ: 
کوردسات نیوز
ڕێکخراوی خۆراک و کشتوکاڵی سەر بە نەتەوە یەکگرتووەکان (فاو) ڕایگەیاند، بەھۆی کەمی پەینی کیمیاییەوە، مەترسی ڕاستەقینە دروستبووە لەسەر بەرھەمی کشتوکاڵیی لە ساڵی داھاتوودا. پسپۆڕانی ئابوریش دەڵێن، تا کۆتایی ئەمساڵ نرخی خۆراک بە ڕێژەی ١٠٪ بەرزتر دەبێتەوە.

ئاماژەی بەوەشکردووە، ئەگەر لە دوو مانگی داھاتوودا پەینی کیمیایی پێویست بۆ ناوچە کشتوکاڵییەکانی جیھان دابین نەکرێت، چاوەڕوان دەکرێت بەرھەمی کشتوکاڵی ڕوو لە کەمبوونەوە بکات.

ڕێکخراوی فاو ڕوونیکردووەتەوە، کێشەکە پەیوەندیی بە وەرزی دروێنەی ساڵی ٢٠٢٣ەوە ھەیە کە بەھۆی مەترسی کەمی پەینی کیمیاییەوە لە وڵاتانی ڕووسیا و بێلاروس، مەترسی لەسەر بەرھەمی کشتوکاڵی زۆرێک لە ناوچەکانی جیھان دروستبووە.

پسپۆڕانی ئابوریش دەڵێن، بەھۆی کاریگەرییەکانی جەنگی ئۆکراین و گۆڕانکارییەکانی کەشوھەوا، چاوەڕوان دەکرێت تا کۆتایی ئەمساڵ، لە بەشێک لە وڵاتانی جیھان نرخی خۆراک و شمەک بە ڕێژەی ١٠٪ بەرزببێتەوە.