دادگای فیدراڵی لەسەر بڕیاری ڕاگرتنی پارە بۆ هەرێم ڕوونکردنەوە دەدات
کوردسات نیوز
سەرۆکی دادگای باڵای فیدراڵی عێراق رایگەیاند، بریارەکانی دادگا بە ئامانجی بونیادنانی دەوڵەتە و ئامانجی بەشێکی کۆمەڵگە نییە، ئەوەش لەیەکەم ھەڵوێستیدا لەبارەی کاردانەوەکانی دوای بڕیارەکەی دادگا بۆ راگرتنی ناردنی پارە بۆ ھەرێمی کوردستان.
جاسم عەبود سەرۆکی دادگای باڵای فیدراڵی عێراق لە چاوپێکەوتنێکدا لەگەڵ ئاژانسی ھەواڵی فەرمی عێراق رایگەیاند، دادگا پابەندە بە جێبەجێکردنی دەستور و یاسا و پێویستە ئەوە لە بڕیارەکانیدا لەبەرچاو بگرێت.
وتیشی یاسای بودجەی گشتی فیدرالێ ساڵی ٢٠٢١، لە مادەی ١١یدا رێکارەکانی یەکلاییکردنەوەی شایستە داراییەکانی نێوان حکومەتی عێراق و حکومەتی ھەرێم، ساڵانی ٢٠٠٤ تا ٢٠٢٠، دیاری کردوە، لە بەرئەوە ئەنجومەنی وەزیران بۆی نییە ھیچ بریارێک بدات، کە پێچەوانەی یاساکە بێت، بە تایبەتی کە ئەنجومەنی وەزیران تاکە لایەنی بەرپرسیارە بەرامبەر بە جێبەجێکردنی دەستوور.
قسەکانی سەرۆکی دادگای باڵای فیدرالی دوای کاردانەوەکانی ھەرێمی کوردستان دێت دەربارەی بریاری راگرتنی ناردنی ٤٠٠ ملیارەکەی ھەرێمی کوردستان لەلایەن دادگای فیدراڵی عێراقەوە.
|