حکومەتی سوریا گەمارۆ دەخاتەسەر ناوچە کوردنشینەکانی حەلەب

2023-11-30   |  
فۆتۆ: 
کوردسات نیوز
ماوەی ھەفتەیەکە ھێزەکانی حکومەتی سوریا گەمارۆیان خستووەتەسەر چەند گەڕەک و ناوچەیەکی کوردنشین لە حەلەب، ئیدارەی خۆسەری رۆژئاوای کوردستانیش دەڵێت، ئەگەر گەمارۆکە بەردەوام بێت مەترسی کارەساتی مرۆیی ھەیە.

ئەو ناوچانەی گەمارۆیان خراوەتەسەر بریتین لە ناوچەیەکی تایبەت بە ئاوارەکانی عەفرین و ھەردوو گەڕەکی شێخ مەقسود و ئەشرەفیە لە حەلەب، ماوەی ھەفتەیەکیشە فیرقەی چواری سوپای سوریا رێگە بە گەیاندنی سوتەمەنی و پێداویستییەکانی دیکە بۆ ئەو ناوچانە نادات.

ئەو ناوچە کوردنشینانە لە چوار دەروازەوە دەتوانن پێداویستییەکان بەدەستبگات، سێ دەروازەیان لەگەڵ گروپەکانی ئۆپۆزسیۆنی نزیک لە تورکیان و بە تەواوی داخراون، دەروازەی چوارەمیش لەژێر کۆنتڕۆڵی حکومەتی سوریایە و لەئێستادا داخراوە.

ئیدارەی خۆسەری رۆژئاوای کوردستان ھۆشداری لە بەردەوامی گەمارۆکە دەدات بەتایبەت بەردەوامی نەبوونی کارەبا و پێداویستی تەندروستی و دەڵێت، ئەگەر بەمزوانە سوتەمەنی نەگاتە ناوچەکانیان، مەترسی کارەساتێکی مرۆیی دەکرێت.