بڕیارە لە چەند سەعاتی داھاتوودا چوارچێوەی ھەماھەنگی بە ئامادەبوونی محەمەد شیاع سودانی سەرۆک وەزیرانی عێراق سەبارەت بە تێپەڕاندنی پڕۆژەیاسای بودجە کۆبوونەوەیەکی گرنگ ئەنجامبدات.
بە گوێرەی زانیارییەکانی پەیامنێری کوردسات نیوز لە بەغداد، وابڕیارە لە چەند سەعاتی داھاتوودا لەماڵی ھادی عامری سەرۆکی ھاوپەیمانی فەتح لە بەغداد، کۆبوونەوەیەکی گرنگی سەرکردەکانی چوارچێوەی ھەماھەنگی بە ئامادەبوونی محەمەد شیاع سودانی سەرۆک وەزیرانی عێراق بەڕێوەبچێت.
ھەر بە گوێرەی زانیارییەکان، لە کۆبوونەوەکەدا چەند ئەندامێکی لیژنەی دارایی ئەنجومەنی نوێنەران بەشدار دەبن و کۆبوونەوەکە تایبەت دەبێت بە تاوتوێکردنی دوایین بەرەوپێشچوونەکان لە گفتوگۆی نێوان لایەنە سیاسییەکان بۆ تێپەڕاندنی پڕۆژەیاسای بودجە.